ဗီတာမင် B3 သို့မဟုတ် Niacin ဟာ ရေမှာပျော်ဝင်တဲ့ ဗီတာမင်အမျိုးအစား ဖြစ်ပါတယ်။

ဒီဗီတာမင်က ကျွန်မတို့ရဲ့ စွမ်းအင်၊ အသားအရေ၊ နှလုံးကျန်းမာရေးနဲ့ ဦးနှောက် လုပ်ဆောင်ချက်တွေအတွက် အရေးပါတဲ့ အာဟာရဓာတ်တစ်မျိုးပါ။

​

          •         ဗီတာမင် B3 ကို ခန္ဓာကိုယ်က ထုတ်လုပ်နိုင်သလား?

ဗီတာမင် B3 ကို ကျွန်မတို့ရဲ့ ခန္ဓာကိုယ်က ပမာဏအနည်းငယ်ထုတ်လုပ် နိုင်စွမ်း ရှိပါတယ်။ ဒါပေမယ့် ဒီပမာဏက လုံလောက်မှုမရှိတာကြောင့် အဓိကအားဖြင့် အစားအစာတွေ ကနေ ရယူဖို့လိုအပ်ပါတယ်။ ခန္ဓာကိုယ်က အမိုင်နိုအက်ဆစ် တစ်မျိုးဖြစ်တဲ့ ထရစ်ဖတိုဖန် (Tryptophan) ကနေ Niacin ကို ပြောင်းလဲထုတ်လုပ်ပေးတာဖြစ်ပေမယ့် ဒါကိုလည်း အစားအစာကနေ ရမှ ဖြစ်မှာပါ။

​

          •         ဗီတာမင် B3 ကို ခန္ဓာကိုယ်မှာ သိုလှောင်ထားနိုင်သလား?

ဗီတာမင် B3 ဟာ ရေမှာ ပျော်ဝင်တဲ့ ဗီတာမင်ဖြစ်တာကြောင့် ခန္ဓာကိုယ်ထဲမှာ သိုလှောင် ထားနိုင်စွမ်း သိပ်မရှိပါဘူး။ လိုအပ်တာထက် ပိုတဲ့ ပမာဏကို ဆီးကနေ စွန့်ထုတ်လိုက်တာမို့ နေ့တိုင်း မျှတစွာ စားသုံးပေးဖို့ လိုပါတယ်။

​

          •         ဗီတာမင် B3 ချို့တဲ့လျှင် ကြုံတွေ့ရမယ့် ကျန်းမာရေးပြဿနာများ

ဗီတာမင် B3 ချို့တဲ့ရင် “ပယ်လာဂရာ” (Pellagra) လို့ခေါ်တဲ့ ရောဂါဖြစ်လာ နိုင်ပါတယ်။ ဒါဟာ အသားအရေယားတာ၊ အနီစက်ထွက်တာ၊ ဝမ်းလျှောတာ၊ စိတ်ဖိစီးမှု၊ စိတ်ဓာတ်ကျတာတွေ ဖြစ်လာစေပါတယ်။ ပင်ပန်းနွမ်းနယ်တာ၊ အစာမကြေတာတွေလည်း ဖြစ်တတ်ပါတယ်။

​

          •         ဗီတာမင် B3 ပိုလျှံလွန်းလျှင် ကြုံတွေ့ရမယ့် ကျန်းမာရေးပြဿနာများ

ဗီတာမင် B3 ဟာ ရေမှာ ပျော်ဝင်တာမို့ သဘာဝအစားအစာကနေ ပိုလျှံတာက ခဲယဉ်းပါတယ်။ ဒါပေမယ့် ဓာတုဆေးတွေ အလွန်အကျွံ သောက်မိရင် “Niacin Flush” လို့ခေါ်တဲ့ အခြေအနေဖြစ်လာနိုင်ပါတယ်။ ဒါကြောင့် မျက်နှာပူတာ၊ အသားအရေနီတာ၊ ယားတာ၊ ခေါင်းကိုက်တာ၊ ဗိုက်အောင့်တာတွေ ဖြစ်လာနိုင်ပါတယ်။ ဒါက အစားအစာကနေ ပိုတာထက် ဓာတုဆေးတွေ မျှမတ သောက်မိတဲ့အခါ ပိုဖြစ်တတ်ပါတယ်။

​

          •         ဗီတာမင် B3 ရရှိနိုင်တဲ့ သဘာဝအရင်းအမြစ်များ

ဗီတာမင် B3 ကို မြန်မာ့ဒေသခံ အစားအစာတွေကနေ လွယ်ကူစွာ ရယူနိုင်ပါတယ်။

ဥပမာ -

          •         ကြက်သား (မြန်မာ့ရိုးရာ ကြက်သားဟင်းတွေမှာ ပါတယ်)

          •         ငါးကြင်း (မြန်မာ့ရိုးရာ ငါးကြင်းဟင်းချိုမှာ ရတယ်)

          •         မြေပဲ (မုန့်ဖုတ်ထဲထည့်တာ၊ သုပ်စားတာတွေ လုပ်လို့ရတယ်)

          •         ဆန်လုံးညို (နေ့တိုင်း ထမင်းချက်ရင် အလွယ်ရတယ်)

          •         ပဲနီလေး (ဟင်းချိုထဲ ထည့်ချက်လို့ရတယ်)

 

သဘာဝအရင်းအမြစ်က ရရှိတဲ့ ဗီတာမင် B3 နှင့် ဓာတုဆေး ဗီတာမင် B3 ကွာခြားချက်

သဘာဝအစားအစာကနေရတဲ့ ဗီတာမင် B3 ဟာ ခန္ဓာကိုယ်က လိုအပ်သလောက် အသုံးပြုပြီး ပိုတာကိုဆီးကနေ သဘာဝအတိုင်းစွန့်ထုတ်လိုက်တာမို့ ဘေးကင်းပြီး ကျန်းမာရေး နဲ့ ညီညွတ်ပါတယ်။

ဒါပေမယ့် ဓာတုဆေးနဲ့ ဖြည့်စွမ်းထားတဲ့ ဗီတာမင် B3 ကို မလိုအပ်ဘဲ အလွန်အကျွံ သောက်မိရင် မျက်နှာပူတာ၊ ယားတာ၊ ဗိုက်အောင့်တာတွေ ဖြစ်လာနိုင်ပါတယ်။ ဒါကြောင့် ဆရာဝန်ညွှန်ကြားချက်မရှိဘဲ ဓာတုဆေးတွေ မသောက်ဘဲ သဘာဝအစားအစာကနေ ရယူတာကသာ အကောင်းဆုံးပါ။

​