အာဟာရဓာတ်များ၏ အခြေခံသဘောတရား
အာဟာရဆိုတာ ဘာလဲ?
အာဟာရဆိုတာ လူ့ခန္ဓာကိုယ်ရဲ့ ကျန်းမာရေး၊ ကြီးထွားဖွံ့ဖြိုးမှု နဲ့ နေ့စဉ်လုပ်ငန်း ဆောင်တာတွေအတွက် မရှိမဖြစ်လိုအပ်တဲ့ ဓာတ်ပစ္စည်းတွေပါ။ ရိုးရှင်းစွာပြောရရင် အာဟာရ ဆိုတာ ကျမတို့ စားသုံးတဲ့ အစားအစာတွေကနေ ရရှိတဲ့ အာဟာရဓာတ်တွေ ဖြစ်ပါတယ်။ ဒီအာဟာရဓာတ်တွေက ကျမတို့ရဲ့ ခန္ဓာကိုယ်ကို စွမ်းအင်ပေးရုံသာမကပဲ ဆဲလ်တွေ ပြန်လည် ပြုပြင်ဖွဲ့စည်းဖို့၊ ရောဂါတွေကို ကာကွယ်ဖို့နဲ့ အင်္ဂါအစိတ်အပိုင်းတွေရဲ့ လုပ်ဆောင်မှုတွေကို ထိန်းသိမ်းပေးဖို့လည်း အထောက်အကူပြုပါတယ်။
အာဟာရဓာတ်တွေကို အဓိက အုပ်စုကြီး ခုနစ်မျိုးခွဲထားပါတယ်။ ဒါတွေကတော့ ကာဗို ဟိုက်ဒရိတ်၊ ပရိုတင်း၊ အဆီ၊ ဗီတာမင်၊ သတ္တုဓာတ်၊ ရေ နဲ့ အမျှင်ဓာတ်တို့ပဲ ဖြစ်ပါတယ်။ ဒီအာဟာရဓာတ်တွေ တစ်ခုချင်းစီဟာ ခန္ဓာကိုယ်မှာ သီးခြားလုပ်ဆောင်ချက်တွေ ရှိကြပါတယ်။
ဥပမာအနေနဲ့ ကာဗိုဟိုက်ဒရိတ်က စွမ်းအင်ပေးတဲ့ အဓိကဓာတ်ဖြစ်ပြီး ပရိုတင်းကတော့ ကြွက်သားတွေ၊ တစ်ရှူးတွေ ဖွဲ့စည်းဖို့ လိုအပ်ပါတယ်။
ဗီတာမင်နဲ့ သတ္တုဓာတ်တွေကတော့ ခန္ဓာကိုယ်ရဲ့ ဇီဝကမ္မဖြစ်စဉ်တွေကို ထိန်းညှိပေးပြီး ရေကတော့ ခန္ဓာကိုယ်ရဲ့ အပူချိန်ထိန်းညှိမှုနဲ့ အာဟာရဓာတ်တွေ သယ်ယူပို့ဆောင်ရာမှာ အရေး ပါပါတယ်။
အာဟာရဓာတ်တွေကို ကျမတို့ နေ့စဉ်စားသုံးတဲ့ အစားအစာတွေဖြစ်တဲ့ ဆန်၊ ဂျုံ၊ အသား၊ ငါး၊ ဥများ၊ နို့ထွက်ပစ္စည်း၊ ဟင်းသီးဟင်းရွက် နဲ့ သစ်သီးတွေကနေ ရရှိပါတယ်။
ဒါပေမယ့် ဒီအစားအစာတွေကို မျှတအောင် စားသုံးဖို့ လိုအပ်ပါတယ်။
တစ်မျိုးတည်းကိုပဲ အလွန်အကျွံစားရင် ဒါမှမဟုတ် တစ်ခုခုကို လုံးဝချန်ထားရင် ခန္ဓာ ကိုယ်မှာ အာဟာရဓာတ် မမျှတမှုတွေ ဖြစ်ပေါ်လာနိုင်ပါတယ်။
ဥပမာ၊ ကာဗိုဟိုက်ဒရိတ်ပဲ အလွန်စားပြီး ပရိုတင်းနည်းရင် ကြွက်သားတွေ အားနည်း လာနိုင်သလို ဗီတာမင်ဓာတ်ချို့တဲ့ရင်လည်း ရောဂါတွေကို ခံနိုင်ရည်နည်းလာနိုင်ပါတယ်။
ဒါကြောင့် အာဟာရဆိုတာ ခန္ဓာကိုယ်ရဲ့ “လောင်စာဆီ” တစ်မျိုးလို့လည်း တင်စား ပြောလို့ရပါတယ်။ ကားတစ်စီးမှာ လောင်စာဆီမရှိရင် မလည်ပတ်နိုင်သလို လူ့ခန္ဓာကိုယ်မှာ လည်း အာဟာရဓာတ်တွေ မမျှတရင် ကျန်းမာရေး ထိခိုက်လာနိုင်ပါတယ်။
ဒါပေမယ့် အာဟာရဓာတ်တွေကို မျှတအောင်စားရုံနဲ့တင် မလုံလောက်ပါဘူး။ အစား အစာတွေကို ကျန်းမာရေးနဲ့ညီညွတ်အောင် ရွေးချယ်စားသုံးဖို့၊ ပြုပြင်ချက်ပြုတ်တဲ့ နည်းလမ်း ကအစ သတိထားဖို့ လိုအပ်ပါတယ်။
အနှစ်ချုပ်အနေနဲ့ အာဟာရဆိုတာ ကျမတို့ရဲ့ ခန္ဓာကိုယ်ကို ကျန်းမာသန်စွမ်းစေဖို့၊ ရောဂါ တွေကို ကာကွယ်ဖို့ နဲ့ နေ့စဉ်ဘဝမှာ တက်ကြွစွာ လှုပ်ရှားနိုင်ဖို့ မရှိမဖြစ် လိုအပ်တဲ့ အစားအစာကနေ ရရှိတဲ့ ဓာတ်ပစ္စည်းတွေပဲ ဖြစ်ပါတယ်။ ဒီအာဟာရဓာတ်တွေကို မျှတအောင် စားသုံးခြင်းအားဖြင့် ကျမတို့ဟာ ကျန်းမာပြီး သက်ရှည်နေထိုင်နိုင်မှာ ဖြစ်ပါတယ်။
