ဇင့် (Zinc) ဟာ ရေမှာ ပျော်ဝင်တဲ့ သတ္တုဓာတ်အမျိုးအစားဖြစ်ပါတယ်။ ဒီသတ္တုဓာတ်က ကျွန်မတို့ရဲ့ ကိုယ်ခံအားစနစ်၊ အသားအရေနဲ့ ဆံပင်ကျန်းမာရေး၊ အနာကျက်မြန်စေမှု၊ အရသာခံစားနိုင်စွမ်းနဲ့ ကြီးထွားဖွံ့ဖြိုးမှုအတွက် အရေးပါတဲ့ အာဟာရဓာတ်တစ်မျိုးပါ။

•         ဇင့်ကို ခန္ဓာကိုယ်က ထုတ်လုပ်နိုင်သလား?

ဇင့်ကို ကျွန်မတို့ရဲ့ခန္ဓာကိုယ်က သူ့ဘာသာသူ ထုတ်လုပ်နိုင်စွမ်း မရှိပါဘူး။ ဒါကြောင့် ဒီသတ္တုဓာတ်ကို အစားအစာတွေကနေ မဖြစ်မနေ ရယူဖို့ လိုအပ်ပါတယ်။

•         ဇင့်ကို ခန္ဓာကိုယ်မှာ သိုလှောင်ထားနိုင်သလား?

ဇင့်ကို ခန္ဓာကိုယ်ထဲမှာ အနည်းငယ်သာ သိုလှောင်ထားနိုင်ပါတယ်။ အဓိကအားဖြင့် ကြွက်သားတွေ၊ အရိုးတွေ၊ အသည်းနဲ့ ရိုးတွင်းချဥ်ဆီတွေမှာ သိုလှောင်ထားပြီး သိုလှောင်မှု ပမာဏက အကန့်အသတ်ရှိတာကြောင့် နေ့စဉ် မျှတစွာ စားသုံးပေးဖို့ လိုပါတယ်။

•         ဇင့် ချို့တဲ့လျှင် ကြုံတွေ့ရမယ့် ကျန်းမာရေးပြဿနာများ

ဇင့် ချို့တဲ့ရင် ကိုယ်ခံအားနည်းတာ၊ ဖျားနာလွယ်တာ၊ ဆံပင်ကျွတ်တာ၊ အသားအရေ ခြောက်သွေ့တာ၊ အနာကျက်နှေးတာတွေ ဖြစ်လာနိုင်ပါတယ်။ အရသာခံစားနိုင်စွမ်း နည်းတာ၊ အစာစားချင်စိတ် မရှိတာ၊ ကလေးတွေမှာ ကြီးထွားနှုန်းနှေးတာတွေလည်း ဖြစ်တတ်ပါတယ်။

•         ဇင့် ပိုလျှံလွန်းလျှင် ကြုံတွေ့ရမယ့် ကျန်းမာရေးပြဿနာများ

ဇင့် ပိုလျှံလွန်းရင် ဗိုက်အောင့်တာ၊ ဝမ်းလျှောတာ၊ အော့အန်တာ၊ ခေါင်းကိုက်တာတွေ ဖြစ်လာနိုင်ပါတယ်။ ပိုဆိုးရင် သံဓာတ်နဲ့ ကြေးဓာတ် (Copper) စုပ်ယူမှု နည်းသွားတာ၊ ကိုယ်ခံအားထိခိုက်တာတွေ ဖြစ်တတ်ပါတယ်။ ဒါက အစားအစာကနေ ပိုတာထက် ဓာတုဆေး တွေ အလွန်အကျွံသောက်မိတဲ့အခါ ပိုဖြစ်တတ်ပါတယ်။

•         တစ်နေ့တာ လိုအပ်ချက်

ပမာဏအရွယ်ရောက်သူတွေအတွက် တစ်နေ့တာ ဇင့် လိုအပ်ချက်က အမျိုးသားတွေမှာ (၁၁) မီလီဂရမ် (mg) ခန့်၊ အမျိုးသမီးတွေမှာ (၈) မီလီဂရမ် (mg) ခန့် လိုအပ်ပါတယ်။ ကိုယ်ဝန်ဆောင်မိခင်တွေမှာ ၁၁-၁၂ မီလီဂရမ် (mg) ထိ လိုအပ်နိုင်ပါတယ်။ ဒါက အကြမ်းဖျင်း ပမာဏဖြစ်ပြီး လူတစ်ယောက်ချင်းစီရဲ့ အခြေအနေပေါ် မူတည်ပြီး ပြောင်းလဲနိုင်ပါတယ်။