သကြားဓာတ်ဆိုတာ ကာဘိုဟိုက်ဒရိတ်ရဲ့ အခြေခံပုံစံတစ်ခုဖြစ်ပြီး ရေထဲမှာ ပျော်ဝင် တတ်တဲ့ အာဟာရဓာတ်ပါ။ ဒီသကြားဓာတ်က ကျွန်မတို့ရဲ့ခန္ဓာကိုယ်ကို လျင်မြန်စွာ စွမ်းအင် ဖြည့်ပေးနိုင်ပြီး ဦးနှောက်၊ ကြွက်သားတွေအတွက် အရေးပါတဲ့ အခန်းကဏ္ဍမှာ ပါဝင်ပါတယ်။

​

          •         သကြားဓာတ်ကို ခန္ဓာကိုယ်က ထုတ်လုပ်နိုင်သလား?

ဟုတ်ပါတယ်။ သကြားဓာတ် (ဂလူးကို့စ်) ကို ကျွန်မတို့ရဲ့ ခန္ဓာကိုယ်က အနည်းငယ် ထုတ်လုပ်နိုင်စွမ်းရှိပါတယ်။ ဒီလုပ်ငန်းစဉ်ကို “ဂလူးကိုနီအိုဂျီနီဆစ်” လို့ ခေါ်ပြီး အသည်းမှာ ပရိုတင်းနဲ့ အဆီကနေ ပြောင်းလဲဖန်တီးတာပါ။ ဒါပေမယ့် ဒီပမာဏက သိပ်မများဘူးဆိုတော့ အစားအစာကနေ ပုံမှန်ရယူဖို့ လိုအပ်နေတုန်းပါ။

​

          •         သကြားဓာတ်ကို ခန္ဓာကိုယ်မှာ သိုလှောင်ထားနိုင်သလား?

သကြားဓာတ်ကို “ဂလိုင်ကိုဂျင်” ဆိုတဲ့ ပုံစံနဲ့ အသည်းနဲ့ ကြွက်သားတွေမှာ သိုလှောင် ထားနိုင်ပါတယ်။ ဒါပေမယ့် ဒီသိုလှောင်မှုက အကန့်အသတ်ရှိတာမို့ ပိုလျှံသွားရင် အဆီအဖြစ် ပြောင်းသွားပြီး သိမ်းဆည်းခံရပါတယ်။ ဒါကြောင့် မျှတစွာ စားသုံးဖို့ အရေးကြီးပါတယ်။

​

          •         သကြားဓာတ် ချို့တဲ့လျှင် ကြုံတွေ့ရမယ့် ကျန်းမာရေးပြဿနာများ

သကြားဓာတ် ချို့တဲ့သွားရင် ပင်ပန်းနွမ်းနယ်တာ၊ အာရုံစူးစိုက်လို့မရတာ၊ ခေါင်းမူးတာ၊ တုန်တုန်ရီရီဖြစ်တာတွေ ဖြစ်လာနိုင်ပါတယ်။ အထူးသဖြင့် ဦးနှောက်က ဂလူးကို့စ်ကို အဓိက အားကိုးနေရတာမို့ ချို့တဲ့ရင် တွေးတောနိုင်စွမ်း ကျဆင်းတာမျိုးလည်း တွေ့ရတတ်ပါတယ်။ ဒါ့အပြင် ကာဘိုဟိုက်ဒရိတ်ကို လုံးဝဖြတ်ထားတဲ့ အစားအသောက်ပုံစံတွေမှာလည်း ဒီလိုပြဿ နာတွေ ဖြစ်တတ်ပါတယ်။

​

          •         သကြားဓာတ် ပိုလျှံလွန်းလျှင် ကြုံတွေ့ရမယ့် ကျန်းမာရေးပြဿနာများ

သကြားဓာတ်ကို များလွန်းအောင်စားသုံးမိရင် ကိုယ်အလေးချိန်တက်တာ၊ ဆီးချိုရောဂါ ဖြစ်နိုင်ခြေမြင့်တက်တာ၊ သွားပိုးစားတာတွေ ဖြစ်လာနိုင်ပါတယ်။ ဒါ့အပြင် အချိုရည်၊ သကြားလုံးတွေလို စီမံထုတ်လုပ်ထားတဲ့ သကြားဓာတ်တွေ အလွန်အကျွံစားရင် နှလုံးရောဂါ ဖြစ်နိုင်ခြေလည်း များလာတတ်ပါတယ်။ ဒါကြောင့် သတိထားပြီး မျှတအောင်စားသုံးဖို့ လိုပါတယ်။